“Feitos, mellor que palabras; cooperación antes que intervención”, pediu o presidente cubano na ONU en memoria de Mandela

Axencias – Terra Sen Amos

O presidente de Cuba recordou a Nelson Mandela coma rebelde obrigado a loitar contra a inxustiza cos medios de que se puider valer, depois de lle pecharen os camiños de paz, coma defensor dos dereitos humanos e dos dereitos do seu povo, e no seu papel de politico que cambiou a historia. Intervindo no Cume de Paz Nelson Mandela, na Asemblea Xeral da ONU, Diaz-Canel citaba ao primeiro presidente democrático de Suláfrica na súa condición de Nobel da Paz, porén a realidade da violencia imperialista levárao a reivindicar a xustiza para o seu povo por todos os medios.

Diaz Canel dialogou con representantes do Congreso do EUA na sede da Misión de Cuba na ONU.

“Pensemos tamén en Mandela na súa fasquía de rebelde –dixo Diaz Canel- obrigado a loitar contra a inxustiza cando viu que lle pechaban todos os camiños pacíficos; no preso político e defensor dos dereitos humanos e dos dereitos do seu povo e no político que cambióu a historia”.

O presidente recordou a Raúl Castro cando o anterior presidente de Cuba dixo que lembraba a Mandela coma figura da heroica loita do povo sudafricano contra o governo infame do apartheid, que ficara na memoria do povo de Cuba como persoa firme, valente, serena, intelixente e capaz.

O presidente de Cuba referiuse ao aumento do gasto militar promovido por EUA, inzando no mundo unha nova carreira das armas a despeito dos recursos que o planeta precisa imperiosamente para construir a paz. “Non pode haber progreso sen paz e estabilidade, nin paz e estabilidade sen progreso: non será posibel atopar paz e seguridade en povos con altos níveis de pobreza, con fame crónica, necesidade, sede e analfabetismo; con altos índices de mortandade infantil, baixa esperanza de vida e andacios que poden ser tratados con normalidade.

Darmos construido un mundo de paz, no que impere a solución dialogada dos conflictos, obriga a atender as causas verdadeiras que os producen, dixo Diaz-Canel: “millóns de excluidos por un orde económico internacional inxusto, desprazados e famentos que escapan das guerras na busca de territorios de fartura, acomodados mercé ao despoxo dos nosos povos”.

Recordou o representante de Cuba que o único tributo a altura da memoria de Mandela, era traballar polo progreso das nacións deprimidas, con actos antes que palabras; cooperación, antes que intervención e solidariedade e non despoxo.

 

 

Deixa unha resposta

O teu enderezo electrónico non se publicará