O Padroado da Fundación Curros, honra a memoria da emigración galega en Cuba

Redacción de TSA
O Centro Unión Ourensá da Habana, fundado por emigrantes en 1909, recebeu o trixésimo primeiro premio “Celanova, Casa dos Poetas”, fallado dia 20 en Celanova na asemblea anual do Padroado da Fundación Curros Enríquez. O Padroado valorou o patriotismo do centro, expresado no seu compromiso coa língua e a cultura de Galiza, e en particular na súa fidelidade á figura de Manuel Curros Enríquez. O premio distingue tamén a vontade dos traballadores emigrantes a prol dunha Galiza gobernada de seu e a súa contribución a identidade galega representada en institucións básicas para o país enviadas dende Cuba, coma cadros políticos e fondos para as sociedades agrarias, o finanzamento da prensa agrarista, republicana e nacionalista, o primeiro plano escolar, a bandeira, o himno a Academia da Língua e a fundación de 75 publicacións periodicas galegas en toda a illa. Na vela incesante do Centro pola identidade e a cultura do País, o Padroado cita a recente posta en marcha dun obradoiro de cultura galega que leva o nome de Manuel Curros Enríquez.

Asemblea recente do  Centro Unión Ourensá, celebrada no salón de hnra do histórico Centro Galego da Habana
Asemblea recente do Centro Unión Ourensá, celebrada no Salón de Honra do histórico Centro Galego da Habana

Antonio Piñeiro, secretario da fundación celanovesa, lembrou con agradecemento o proxecto iniciado en 1927 polo Centro Unión Ourensá da “Casa dos Poetas”, coa adquisición por 16.000 pesetas de dúas terceiras partes da casa familiar de Curros. A entrega do premio será 6 de setembro por ser a data máis próxima ao aniversario da morte (36 anos) doutro dos grandes poetas celanoveses, Celso Emilio Ferreiro, a quen tamén se lle renderá homenaxe. Na xuntanza aprobáronse as bases definitivas para a inminente creación dun premio de xornalismo para mozos que se presentará durante o mes de agosto, así como a posta en marcha de diversas iniciativas destinadas a comemorar o centenario do nacemento o 21 de abril 2016, de Pepe Velo Mosquera, mestre, poeta e patriota que en 1961 interviu o buque Santa María para denunciar as ditaduras de Franco e Salazar.

Deixa unha resposta

O teu enderezo electrónico non se publicará